... بكرة عيد ميلادي .... إي شو يعني!! مابعرف شو المهم بالموضوع بس هيك من باب العلم بالشيء عم خبركن ....أكتر عيد ميلاد لألي بتذكرو هوي لما كان عمري ثماني سنوات ...فقت الصبح و ماني نسيانة أنو اليوم عيد ميلادي و كنت مخططة من قبل بيوم أنو رح أعمل حفلة عيد ميلاد ما صارت و أعزم عليها كل رفقاتي بالصف و كنا وقتها صف تالت بجوز ... المهم رحت لعند ماما و بلشت أحكي بدون توقف ع الكيك و الزينة و رفقاتي اللي بدي أعزمهم و هني حاطة إيدها على بطنها و بتتوجع ... كانت حامل ماما و كانت بآخر أيام الحمل و ممكن بأي لحظة تولد ... و بلشت تقلي ياماما أنا موجوعة أجلي عيد ميلادك لبكرة و أنا قلها لاااا أنا اليوم خلقت مو بكرة و هي حرام عم تسمعلي و ما عم تقدر تحكي ... و عنجد لهلق ما بتروح صورتها من بالي كيف عم تحاول تسمعلي و بنفس الوقت عم تكبت وجعها و فجأة و أنا منسجمة بالتخطيط بسمعها بتصرخ ماما صبصوب حبيبي روحي شوفي أبوك وين و ابعتيلي ياه ... و أنا شووو كنت تقيلة دم ...قلتلها طيب و بالمرة بقلو يشتريلي ثمان شمعات ... و رحت أركض لأنو هيي بلشت تصرخ و تبكي ... المهم و بلا طول سيرة ما عملت عيد ميلاد و لا عزمت حدا من رفقاتي و لا حدا تذكر يقلي كل عام و أنت بخير و ضليت أبكي للمسا لحالي بالبيت لحتى بيدخلوا ماما و بابا و بيقلولي جبنالك هدية عيد ميلادك ... شو هيي؟؟؟ ربا !! أختي الصغيرة !! و من يومها لليوم و بكل عيد ميلاد لألي و لأختي الصغيرة بعاتبها أنو ضيعت عليي حفلة عيد ميلادي تبع الثمان سنوات ....
ع قبال مية سنة يا ربا و ع قبال سنين معقولة لألي ... انشالله بتعملي منيح بفحص البكالوريا و بشوفك أحلى و أطيب ...شو ما بدك!!
أنا كنت بتمنى لو أني اليوم بالبيت و عم عيد عيد ميلادي مع أهلي بس شو بدنا نعمل ... هيك الدنيا ...
